Aðeins útlendingum boðlegt ?

Mér finnst stundum gott að hugsa upphátt hér á blogginu, og hef verið að pæla í auglýsingu Frjálslynda flokksins. Mér finnst hún góð áminning. Ég viðurkenni alveg að auðvitað hef ég áhyggjur af þessari þróun að hér nenni fæstir innfæddir að vinna verkamannavinnu lengur eða þjónustustörf. Þróunin er í átt til þess að það er ekki talað um að redda manni í verkið heldur að "fá sér Pólverja"... verra þótti mér að heyra í gær þegar ég heyrði unga stelpu segja mér frá því að nýja orðið fyrir perra væri "Pólverji".. og auðvitað eru það fordómar af hæsta stigi. Í boði nýlega heyrði ég konu lýsa því yfir að þessir kvenmannslausu karlar færu um í flokkum og stunduðu hópnauðganir!

Fyrir um það bil ári vantaði  mig pípara og flísalagningamann til að laga húsið sem ég var að standsetja. Fann auglýsingu í Fréttablaðinu þar sem auglýstar voru pípulagnir og flísalagnir. Ég hringdi og þar svaraði maður sem hvorki gat talað íslensku né ensku. Allt í einu kom konurödd í símann og okkur samdist um að Frank (Þjóðverji) myndi mæta kl. 18:00 á staðinn. Til að gera langa sögu stutta mætti Frank stundvíslega kl. 18:00 (eins og Þjóðverjar gera) með flokk Pólverja í eftirdragi og þessi flokkur vann síðan hjá mér. Þetta voru allt hinir kurteisustu menn og átti ég aldrei von á öðru af þeim. 

Það er nauðsynlegt að taka þessar undirölduumræður upp á yfirborðið og ræða málin eins og þau eru í raun og veru. Hverjar eru staðreyndirnar ? Er slæmt að haft sé eftirlit með innflutningi erlends vinnuafls ? Við "innfædd" þurfum einnig að skoða í eigin barm og fara að borga þannig laun að Íslendingar séu tilbúnir að taka að sér ummönnun gamla fólksins á Öldrunarheimilinu og spítölum. Starfandi íslenskir iðnaðarmenn eru gulls ígildi og störfum hlaðnir en samt flykkist allt ungviðið í  bóknám í menntaskóla, margir hverjir til að sitja þar og bora í nefið, sofa eða stunda tölvuleiki vegna þess þeim leiðist bóknám.

Það er eitthvað samhengi þarna á milli. Brottfall úr menntaskólum er gífurlegt - að ég tel vegna þess að við stýrum allt of mörgum í þá átt að ganga sama menntaveginn. Veg sem ekki hentar næstum því öllum. Ungu strákarnir (sérstaklega) verða latir og værukærir, jafnvel "þunglyndir" vegna þess þeir eru að drepast úr leiðindum í skólanum, vantar aksjónið sem er í tölvuleikjunum. Kannski er erfitt að ákveða hver á að fara í menntaskóla og hver iðnskóla, hver beint út á vinnumarkaðinn. En það er verkefni sem þarf að taka á jafnhliða því að við skoðum hvað við erum að gera með að auka eftirspurn eftir erlendu vinnuafli til að vinna þá vinnu sem aðeins útlendingum er boðleg!