...hugsanir í sólinni...

Sit á pallinum í doppottum kjól á eikarsólstól og í kolli mínum bærast allt of margar hugsanir og áhyggjur. Er ein heima og afrekahóllinn sem ég ætlaði að moka í sumarleyfinu er alltof stór, geng hringinn í kringum hann og pota en veit ekki alveg hvar á að byrja. Sit því bara áfram í doppóttum kjól á eikarstól og sný nefi mót sól. 

Njósna um nágrannann bera viðarolíu vandlega á þakkantinn sinn. Ég ber sólarolíu vandlega á leggina mína. Hún angar af karamellu... hér gæti ég haldið áfram og skrifað bullandi erótík en ýmissa hluta vegna kann ég ekki við það afþví þetta er svona opinbert blogg!

Ég hef tekið þá stórkostlegu ákvörðun að snyrta til á pallinum því enn liggur eitthvað af dóti frá gönguferðinni góðu til þerris. Svo má vökva nokkrar stjúpur og þá sjálfa mig um leið. Þetta eru góðar stjúpur, litríkar og gerðar til að veita gleði. Sumum finnst stjúpur leiðinleg blóm, en ég hef ákveðið að gefa þeim séns.

Þar til næst....