Ég verð að segja nei .. við áfengi í matvöruverslanir

 

Betra aðgengi tel ég að auki unglingadrykkju og jafnvel þeirra sem eiga að teljast fullorðin.  Það er eins og með nammið við búðarkassann. Hvaða foreldri er ekki pirraður á því ? Áfengið er svolítið eins og nammið okkar fullorðna fólksins (og því miður unglinganna) og ég held að aukið aðgengi auki hættuna á unglingadrykkju.  Mér finnst aðgengið fínt í dag, - hef aldrei upplifað það sem hömlu að versla áfengi í Kringlunni eða Smáralind. Ekki frekar en ég upplifi það sem hömlu að versla lyf í apóteki eða bækur í bókabúð og svona mætti lengi telja.

Á kössunum í stórmörkuðum starfar mikið af ungum krökkum, sérstaklega yfir sumar- og jólaleyfi - hvað skal gera þá ? ..  Í Danmörku mega krakkar versla bjórinn 15 ára - vinir mínir sem voru með ungling flúðu heim til Íslands vegna frjálslyndis í áfengismálum þar.  Fólk kallar á frelsi, en það þarf að stíga varlega til jarðar í svona frelsismálum. Sumir þurfa frelsi frá áfengi. 

Ekki eru allir sammála um þessi mál  og mörgum finnst þetta rosaleg íhaldssemi í mér.  Við ættum að vera farin að þekkja okkar þjóðarsál. Því miður held ég að við höndlum þetta illa - þjóðin er býsna agalaus nú þegar.  Víða er pottur brotinn í tóbaksmálum og unglingar og fullorðið fólk selur unglingum tóbak þó það sé óleyfilegt. Eini kosturinn sem ég sé við að fá rauðvín í búðirnar er að það er eilítið auðveldara fyrir okkur fullorðna fólkið að krækja í rauðvínsflösku með steikinni. Eins og áður sagði tel ég skrefin á milli Hagkaupa og ÁTVR ekki eftir mér, við hreyfum okkur hvort sem er allt of lítið!  Þessi breyting held ég að yrði ekki unga fólkinu okkar í hag og ég held ég vilji láta  það njóta vafans... 

 

 

Athugasemdir

[Kristín Dýrfjörð, 11.10.2007 kl. 20:46]

fínir punktar

[krossgata, 11.10.2007 kl. 23:23]

Ég verð að segja að mér þætti voðalega þægilegt að geta kippt (eða látið minn ekta kippa með - þar sem hann verslar) rauðvínsflösku með í föstudagsinnkaupunum.  En það er eins og þú nefndi þægindasjónarmið.  Ég þarf það ekki.  Ef það yrði kosið um þetta málefni, þá myndi ég hafna.  Það eru áfengisbúðir út um allt.

[Þóra Guðmundsdóttir, 12.10.2007 kl. 23:00]

Mikið er ég sammála þér, ég var einmitt að blogga um sama efni.