Ljóminn brenndur burtu ...

Bréfritari er að hefja aðra vikuna á einhvers konar bikinístandskroppastandsetningarsjálfspyntingarnámskeiði hjá Hreyfingu.

Í gærkvöldi var þriðji tíminn í hinu alræmda ,,spinning." Sumum finnst þetta gaman, en það vantar augljóslega í mig spinning-greindina, ef þetta er skoðað út frá fjölgreindarkenningu Gardners.

Ég mætti með gelpúðann minn og setti hann á hnakkinn, stillti hjólið eins og pro og held að engin viðstödd hafi séð hnútinn sem ég var með í maganum, eða kannski bara haldið að það væri hluti af púlsmælinum sem ég var búin að spenna utan um mig miðja. Var síðan eins og Grani í Spaugstofunni alltaf að tékka á púlsinum á ,,úrendanum"  svo ég gæti nú náð hámarksfitubruna.

Ég náði alveg örugglega hámarksrassbruna - þrátt fyrir gelið. Af einhverjum ástæðum minntist ég orða Danans sem var samferða í reiðtúrnum yfir Kjöl (í brúðkaupsferð með sinni) ,,Det er lige som at være voldtaget av en isbjörn" sagði hann á þriðja degi Kjalarferðarinnar um leið og hann vatt sér inn í trússbílinn og þáði far með honum.  Sama hversu mörgum dömubindum var búið að vattera manninn með - ekkert dugði!! ..alveg satt!

Tíminn endaði þó ekkert þó ég færi að hugsa og ég hélt mig á réttum púls og fór himinhátt í restina og lofaði alla helga vætti þegar tíminn var búinn. Kannski mest Ágústu Johnson sem sagði að brennslan héldi áfram í nokkra tíma eftir tímann..  ekki brennt til einskis .. eða er þetta kannski allt til einskis ?  Pjúra hégómi ? .. Nei, segi eins og Siggi Sigurjóns (svo ég taki fleiri karaktera með honum) ,,I love it" .. when it is finished

Eftir tímann var okkur smalað á vigt, að vísu einni í einu og niðurskurður eftir vikuna eru 2,3 kíló, en það eru fjögur Ljóma smjörlíkisstykki plús 300 grömm af því fimmta!  

Hefur þú farið á ,,átaksnámskeið" ?

Athugasemdir

[Gísli Baldvinsson (IP-tala skráð) 16.4.2008 kl. 17:48]

Glettilega skemmtileg skrif Jóhanna. Ég hjóla úti í vorinu. kv   gb

[Jónína Dúadóttir, 16.4.2008 kl. 19:52]

Vá þú dugleg

[Jenný Anna Baldursdóttir, 16.4.2008 kl. 20:23]

Nú, nú, þetta er að koma.  Go girl.

[Jóhanna Magnúsar- og Völudóttir , 16.4.2008 kl. 20:56]

Gísli, ég stefni á alvöru hjólamennsku - engin spurning. Miklu skemmtilegra að fara eitthvað en sitja kyrr!

Nei, nei, Gunnar!.. Mín einsömul 2,3 (veit sosem þú vissir það alveg)..

Takk Jónína, já - ég er dugleg - verð að klappa sjálfri mér til að þrauka þetta og gott að fá klapp frá öðrum.

Já, Jenný - þetta er að koma, I will go!

[Halla Rut , 16.4.2008 kl. 21:34]

Þú skrifar svo oft skemmtilega. Þetta orð á skilið verðlaun: bikinístandskroppastandsetningarsjálfspyntingarnámskeið

[Marta B Helgadóttir, 17.4.2008 kl. 00:00]

Fyndin og góð skrif

[Marta B Helgadóttir, 17.4.2008 kl. 00:01]

...ég fékk mér fjallahjól ......til að hjóla úti, það er rosa skemmitilegt

[Tiger, 17.4.2008 kl. 02:16]

  Dugnaðurinn í þér skottið mitt, enda sumarið í nánd svo eins gott að vera við öllu búin. Ef ég þarf á því að halda að missa einhver kíló - þá hætti ég bara að borða á nóttunni í nokkra daga og *púff* kílóin kveðja strax, ekkert puð og ekkert vesen - enda brennslan yfirnáttúrulega mikil á þessum bæ. Knús á þig ljúfan og eigðu góða nótt ...

[Ragnhildur Sverrisdóttir, 17.4.2008 kl. 10:54]

Flott hjá þér! Ég vona að vísindamenn, sem nú eru að endurskoða kílóið, komist að þeirri niðurstöðu að þetta sé í raun og sann 2,5 "ný"kíló.

Ég bendi þér á aðferð sem einn góður maður notar alltaf: Hann þyngist í kílóum, bætir kannski á sig tveimur, en þegar hann missir þau þá er það alltaf í pundum! Allt í einu er hann "fjórum" léttari.

Brilljant fyrir sjálfstraustið.

[Jóhanna Magnúsar- og Völudóttir , 17.4.2008 kl. 11:29]

Hehe Gunnar, er ekki Feit með stóru F-i en þetta er þessi fjandans fullkomnunarárátta í okkur kellunum alltaf!

Takk Halla, ..kannski þetta sé aðeins of langt orð ?.. en tjáði mína tilfinningu fyrir námskeiðinu!

Guðmundur, takk, takk -  gott að þetta virkar hvetjandi en ekki letjandi!

Takk Marta Smarta á fjallahjólinu!

Tigercopper - borða á nóttunni!!!... Þú ert algjör Hómer!

Ragnhildur, já einhvern veginn hljómar vel að missa pund! .. til í það.. 

Eftir því fleiri athugasemdir sem ég fæ langar mig enn meira út að hjóla á alvöru hjóli!  .. Á ónotaðan hjálm og ryðgað hjól sem kannski má pússa smá.

[Ásthildur Cesil Þórðardóttir, 17.4.2008 kl. 11:29]

Superkalifrasiglistileslpilalidoseus    Hahaha jamm ég hef farið í spinning með henni Nínu Óskars meira að segja tvisvar, og mér leið rosalega vel á eftir, grenntist og léttist, minna fitumagn, meiri massi.  En núna er ég í átaki sem er öðruvísi, það er svona að beygja sig aðeins niður, taka utan um lítinn kropp og hífa upp, setjast niður á stól og taka tvo litla kroppa á sitt hvort hnéð, iðandi litla orma út um allt.  En það er eitthvað samt sem gerist því ég er svo glöð inn í mér við að umgangast átaksverkefnin mín. 

[Jóhanna Magnúsar- og Völudóttir , 17.4.2008 kl. 14:19]

Knús Ásthildur, krúttin eru verðug átaksverkefni!