Á fund Árna Johnsen - 1. kafli bloggsápu

Bloggsápa – 1. kafli – 1. hluti. 10. apríl 2007

 

Haraldur Beck gekk niðri fjöru og það kom sandur í Ecco sandalana og kitlaði viðkvæmar iljar hans, það var heitur vindur sem feykti þykkum hárlubba (hönnuðum af Jóa og félögum) frá enninu, eins heitur vindur og hann getur orðið á Íslandi í júlímánuði. Sá heitasti í manna minnum, eins og elstu menn muna reyndar. Haraldur var þess fullviss að vindurinn væri svona heitur vegna þess að honum var svo heitt í hamsi. Hjarta hans tifaði og  tútnaði út eins og brauð sem var að hefast, en hann vissi líka að það myndi harðna þegar það væri bakað. Hörð skorpa utan um mjúkt innihald. Þannig yrði hjarta hans.

 Hin leggjalanga lævísa en þó langfallegasta kona sem hann hafði kynnst, og elstu menn mundu líka eftir: Lovísa Laufdal hafði svikið hann, var nú á leið með Herjólfi til Vestmannaeyja þegar hann hélt að hún væri að koma til sín. Þar var hún eflaust sest niður og farin að snæða vanilluskyrið sem var hennar uppáhald, með engum viðbættum sykri. Hann reif upp stóran grjóthnullung og miðaði á Herjófl, eða punktinn sem virtist vera Herjólfur og grýtti af öllu afli í sjóinn. Steinninn fór þó hallærislega stutt og var Haraldur feginn að enginn sá til hans þegar sjórinn slettist upp á stífpressaðar buxurnar, droparnir gusuðust á Blazer jakkann og sjávarseltan rataði í andlit hans og blandaðist söltum tárum hans.  Fjandans vesen með þessa langfallegu konu, sem gerði hjarta hans að brauði og andlit hans að saltkjöti. Nú sigldi hún í burtu, bara ef göngin hefðu verið komin til Eyja hefði hann getað elt hana á Range Rovernum. Haraldur tók afdrífaríka ákvörðun: Hann ákvað að ganga á fund Árna Johnsens....  framhald í næsta bloggi  (Hvað gerist næst ? Mun Haraldur fá viðtal hjá Árna ? Er Árni viðriðinn grjótið sem Haraldur henti í sjóinn ? Er brauðið að bakast ? Fær Haraldur saltkjöt og baunir í kvöldmatinn ? Hvers vegna flúði Lovísa til Vestmannaeyja ? - þessum spurningum og fleiri verður svarað í næsta kafla bloggsápu.)