Súrt og sætt....og allt þar á milli

Fimmtudagur, 22. nóvember 2007

Ráðdömur mínar og herrar! ....

Ætlaði ekki að blogga meira fyrir Kínaferð.. en verð að lýsa ánægju minni yfir þessa ,,þyrnirósarvakningu" hjá Steinunni Valdísi. Svo á ég akkúrat hádegishlé núna .. svo tilvalið að blogga um þetta.

Fólki finnst skrítið að konur vilji ekki láta kalla sig herra. Hmm.. mér finnst það ekkert skrítið. Ef starfsheitið hefði verið ráðdama og aðeins konur tilheyrt stéttinni hefðu karlar fyrir löngu verið búnir að rísa upp og breyta þessu. Í raun er ótrúlegt að gangast undir þennan "herradóm" í upphafi! Konur hafa eflaust verið svo hrikalega glaðar að komast undir ráðherrahattinn að þær hafa þagað þunnu hljóði.

Það hafa komið fram ábendingar að herra er ekki bara herra í merkingunni karlmaður, heldur líka yfirmaður. En það má nú svolítið pæla í því að herra skuli líka þýða yfirmaður.. Wink .. Heldur einhver að konur hafi verið hugsaðar inn í það mengi þegar orðið herra kom fyrst fram sem yfirmaður ?

Herrann var sá sem réði ... Herrann var yfirmaður...Herrann var karl (eða guð eða bæði)

Ráðherrar eru í raun ráðyfirmenn miðað við þessa yfirmannaútskýringu á herra. Yfirmenn menntamála, umhverfismála o.s.frv.

Ráðstjóri er kannski orðið sem hægt væri að nota og það er auðvitað til kvenkynsútgáfan ráðstýra.

Hvenær eru svo konur menn ? ..

"Konur eru menn" segjum við, en hver segir ,,menn eru konur" ?

Við segjum ekki: ,,Maðurinn er ófrískur." ...

Orðið maður er nefnilega notað á tvo ólíka máta, bæði um mannkyn (inniheldur karla og konur) og um karla.

Það hljómar þó undarlega fyrir stelpur að heyra talað um sig sem "hann"... og þurfa að tala um sig og heyra talað um sig í karlkyni.

Vinkona mín gerði tilraun við kennslu og notaði orðið manneskja í stað maður. Dæmi: "Manneskjan getur verið mismunandi í skapi, hún getur verið blíð, hún getur verið vond, hún getur verið æst o.s.frv."

Það leið ekki á löngu þar til strákur spurði: ,,Af hverju segirðu alltaf hún." ? .. Ertu bara að tala um stelpur ? ...

Sofum ekki eins og þyrnirósir, né pirrumst þó við séum vakin upp til raunveruleikans.

	Vill nýtt starfsheiti fyrir ráðherra
Ábyrgðarmaður færslu Tilkynna um óviðeigandi tengingu við frétt

Flokkur: Bloggar | Facebook

Athugasemdir

Frábær pistill. Takk fyrir moi.

Jenný Anna Baldursdóttir, 22.11.2007 kl. 12:33

Sammála þessari góðu grein, en hvað með að halda orðinu "ráðherra" og taka upp kvenkyns útgáfu af þessu, eins og t.d.: Ráðynja, Ráðstýra eða eitthvað þvíumlíkt? Eða jafnvel ráðdama eins og þú stingur uppá ?

Það hlýtur að vera hægt að finna millileið, og þarf ekki afkyngera allt. ;) Eða hvað?

Guðsteinn Haukur Barkarson, 22.11.2007 kl. 12:46

Jenný: Þakka toi.

Guðsteinn Haukur: Takk fyrir athugasemdina (veit þér leiðist enskuslettan ,,komment") - Ég vil ALLS ekki afkyngera. Neutralt er leiðinlegt er það ekki ? Við erum ekki ÞAÐ, heldur hann eða hún.

Vildi að ég væri með gullnu lausnina, en mun hugleiða þetta áfram. Best er auðvitað svona þankahríð eins og fer fram hér á blogginu t.d. þar sem fullt af fólki kemur með ýmsar lausnir. Þarf bara að finna þá bestu. Nýyrði valda fjaðrafoki en þegar lygnir þá róast fólk. Ef við notum orðið ráðherra áfram væri eðlilegast að nota á móti ráðfrú eða ráðdama. Mér persónulega finnst gaman að vera dama og og gæti gengist undir það, en veit ekki með aðrar konur. Hef aldrei verið fylgjandi því að konur og karlar ættu að vera eins, heldur einmitt að kvengildi og karlgildi ættu að njóta sín sem best.

Jóhanna Magnúsar- og Völudóttir , 22.11.2007 kl. 15:30