Ég skil ekki þessa (póli)tík ...

Ólafur F. er í Íslandshreyfingunni en er fulltrúi Frjálslyndaflokksins í Borginni eins og Margrét var og sem er líka í Íslandshreyfingunni og vill samt ekki vera memm þegar Óli spyr hana.

Það er auðvitað pjúra óeining fólks í Íslandshreyfingunni og ekkert skylt lengur við Frjálslynda flokkinn. Af hverju eru þau eiginlega í Íslandshreyfingunni ef málefnin eru öll fyrir Frjálslynda flokkinn  ?

p.s.

Viðgerðarspurning:

Þurrkarinn minn gengur og blæs en hitnar ekki lengur - samt nýlegur - kann einhver lausn á því ?

Magnús Skarphéðinsson sagðist vilja sjá hvort að fólk væri að ljúga ... ég líka !

Ungur ,,fréttamaður" á ríkissjónvarpinu tók viðtal við Magnús Skarphéðinsson. Sá síðarnefndi óskaði sér að allir menn sæju árur hinna því í litunum kæmi fram ef fólk væri að ljúga.

Ekki veit ég hvaða litir koma fram þegar fólk er að plata, en mikið væri gott ef við gætum séð árur borgarstjórnarmeiri-og minnihluta ... og bara hjá öllum hehe..

Sól og blíða í Selva ..

Set hér inn nokkrar myndir úr skíðaferðinni. Höfum það eins og blóm í eggi. Enda eggjapúns eða Bombardínó vinsælasti drykkurinn í fjölllunum. Það er hálfgerð sykurbomba m/rjóma og einhverju áfengi líka að sjálfsögðu! .

.. Hugsa til allra heima - og hugurinn sérstaklega hjá elskulegri vinkonu minni sem er orðin mjög veik. Kveikti á kerti fyrir hana í fallegri ítalskri sveitakirkju og hugsa til hennar  oft á dag og sérstaklega þegar ég er stödd á fjallatoppunum, en hún elskaði að fara í svona skíðaferðir...

800 krónur klukkutíminn ..

Er í útlöndum (Selva, Val Gardena)  og komst á netið þar sem klukkutíminn kostar 800 krónur. Skulda enn umfjöllun um Bitter Moon. Það kemur vonandi fyrr en síðar.

Ástar og saknaðarkveðjur til allra vina og vandamanna heima. Skíðafæri gott og ég bara orðin alveg ágæt á skíðunum.

Brjóstin að verða trúnni yfirsterkari ?

Ég fór í smá bloggrúnt núna fyrir svefninn og sá þá að margir bloggarar eru að blogga um brjóst. Hvort að flagga megi kvenmannsbrjóstum eða ekki t.d. í Bláa lóninu. Í einni athugasemdinni kom fram að sumir karlmenn eru hreinlega með stærri brjóst en konur! Úff...

Minna sá ég um trúmálablogg - að vísu var Prakkarinn eitthvað að leggja fram sannanir um að  Guð væri ekki til  -  - kíki betur á þetta allt seinna!

Kvikmyndasýning kvöldsins heppnaðist vel - skrifa líka seinna um það.

 

BITTER MOON ...... í kvöld

Ég er meðlimur í kvikmyndaklúbb sem skoðar m.a. trúar- og siðferðisstef í kvikmyndum. Nú er komið að mér að sýna mynd í kvöld og valdi ég myndina Bitter Moon til sýningar.

 

Leikstjóri hennar er Roman Polanski hvorki meira né minna, myndin er frá 1992. Aðalleikarar eru Peter Coyote, Emmanuelle Seigner, Hugh Grant og Kristin Scott Thomas.

Þetta er áleitin mynd, svört kómedía, pervertísk svolítið líka svo ekki sé meira sagt. Þetta er m.a. saga ungrar konu sem tapar sakleysi fyrir veraldarvönum en misheppnuðum rithöfundi sem heitir Oscar. Samband þeirra verður sadómasókískt, hefst á toppnum og endar á botninum ef segja má svo. Saga um  breyskt mannlegt eðli, ást, grimmd og girnd. Saga þessa pars fléttast svo saman við sögu annars pars sem Oscar nýtur þess að leika sér að og nær í raun að spilla þeim líka. Áhorfandinn hneykslast með Nigel, persónu Hugh Grants, þegar Oscar segir honum sögu sína... Well þetta er svona upplifun mín sko sem áhorfanda!

Bæti við þetta eftir sýninguna í kvöld, væri gaman að vita hvort einhver væri búin að sjá myndina og hvað þeim fannst.

GETTU BETUR Í GANGI ...

Klukkan  20:00 munu Hraðbraut og Fjölbrautskóli Suðurlands keppa í spurningakeppni framhaldsskólanna Gettu betur. Ég er að hlusta hér í tölvunni !

Hraðaspurningar: FSU 12   Hraðbraut 7   Ekki gekk það nú vel !

Nú er Hraðbraut með 12 stig og FSU 15 stig .... úff spennandi...

 

 

Afmæliskveðja ...

Guðrún Lilja Tryggvadóttir - dóttir hans Tryggva (mannsins míns m/meiru) .. er 25 ára í dag, hvorki meira né minna.

Gunna er nokkuð klassísk steingeit; samviskusöm og ábyrgðarfull ... þekki þær nokkrar  ... Elskuleg og falleg stelpa og hefur tekið mér .."vondu stjúpunni"  eða þannig afskaplega vel frá upphafi...

Til hamingju með afmælið Gunna Lilja ...

 

 

Sunnudagsbloggsprédikun - Kirkjan er ekki bara hús ...

 Það fer ekkert á milli mála að heitustu umræðurnar sem hér spinnast eru meðal annars vegna trúmála. Þau eru mér mjög tengd þar sem ég er yfirlýst trúmanneskja og guðfræðingur að mennt. Mér hefur þótt hollt að lesa skrif fólks til að víkka sjóndeildarhringinn jafnframt að sjá skrif þeirra sem finnst pottur brotinn í trúmálum. Ég er ekki alltaf sammála öllum sem titla sig kristnar manneskjur og stundum sammála þeim sem titla sig ekki kristna ....  Í raun held ég að sá eini eða sú eina sem veit hver er í hjarta sínu kristinn sé Guð.....

Ég held og vona að innst inni viljum við öll það sama. Kærleiksríkan, réttlátan  og góðan heim. Hvaða leið við förum að því er svo misjafnt. Við verðum að fara varlega í það að gagnrýna meðbræður og systur þó að þau velji aðrar leiðir að kærleikanum.... 

Ég menntaði mig til prests, en þegar fólk spyr mig hvers vegna ég hafi ekki sóst eftir brauði þá svara ég yfirleitt að mér líki ekki umgjörðin. Líki ekki yfirbyggingin, pjátrið, kragarnir og kjólarnir. Kirkjan er eins og leikhús með búningum og propsi. Innihaldið vill oft týnast í öllu þessu skrauti.

Við þurfum að horfa á upphafið - eins og því er lýst hvernig Jesús hafði þetta..

Mér fannst frábært að starfa í sunnudagaskólanum, þar sem ég gat verið búningalaus. Grímulaus má kannski segja.. Þar sem ég var með börnin í kringum mig og við sungum og töluðum um elskuna til hvers annars. Börn eru YNDI.  Þar gat ég kennt boðskap Jesú um náungakærleikann á einfaldan hátt, m.a. að ekki ætti að sparka í aðra krakka því enginn vildi láta sparka í sig.  Þau höfðu oft sögur að segja af einhverjum vondum krökkum og þau ætluðu SKO ekki að vera vond ...

Ég forðaðist allar hamfarasögur eins og Nóaflóð og annað sem ruglar börn (og fullorðna líka) og sumir taka allt of bókstaflega.

Í unglingastarfinu kenndi ég krökkunum hvernig þau gætu búið til sínar eigin trúartjátningar eins og ,,ég veit að Guð er með mér þegar ég er í ástarsorg" .. og það þótti þeim sniðugt... Ég er ekkert hrifin af utanbókarlærdómi þar sem krökkum er uppálagt að læra langlokur og skilja svo ekkert hvað þau eru að segja. Kærleikur fólks verður heldur aldrei mældur í því hversu vel það kann trúarjátninguna utan bókar.

Mér fannst líka gaman að tala í kirkjunni fyrir og við fullorðna og flytja erindi til uppbyggingar sálinni. Það hefur alltaf verið mitt takmark við hugvekjur að byggja upp en ekki brjóta niður og stundum kom einhver og sagði mér að það sem ég hefði sagt hefði hjálpað sér svo mikið og þá var takmarkinu náð og það gladdi mig eflaust ekki minna en manneskjuna sem kom að máli við mig.  ... það er svo gott að gera gott .. Sagði Láki ekki eitthvað svoleiðis þegar hann var farinn að gera góðverk? hehe..

Í dag hjálpa ég á annan hátt í starfi mínu. Margir leita til mín með sínar raunir og sem betur fer líka gleði stundum... stundum tekst mér að peppa fólk upp og hjálpa því upp úr hjólfari sem það hefur verið fast í lengi... Það geri ég með hjálp Guðs en ég blanda Guði ekki inn í það í samtalinu... það er bara milli mín og Guðs..

Kirkjan mín þarf ekki að vera "fancy" eða flott. Hún má alveg vera svolítið kósý og það er nóg að hafa gítar eða píanó - ekki margra milljónkróna orgel. Innviðirnir eru aðalatriðið. Kirkjan er fólkið og margir vita að orðið kirkja þýðir líka söfnuður eða fólk. Kirkja er ekki bara hús. Einu sinni fór ég í brúðkaup á ströndinni við Vík í Mýrdal. Það var svo magnað og fallegt .. öldurnar léku undirspil við sönginn og minntu  okkur viðstödd á almættið.  

Ég held að við höfum gott af samtali hér á blogginu og eigum að sortéra frá það sem er ljótt og niðurbrjótandi og taka til okkar það sem er fallegt og uppbyggilegt....  

Knús - þakka þér góða manneskja fyrir að lesa og Amen.  

Thank God it´s Friday ...

Jæja, búin að vinna í dag, annars ágætur dagur eins og svo margir. Fékk langt hádegi þar sem ég púlaði í ræktinni (verð að auglýsa það því ég er annars svo löt að fara) .. Nú er komin helgi og ég ætla að gera eins og Pamela í Dallas gerði svo oft, en hún hitti Bobby sinn á Restaurant for a light Salad.  ..

Ég er s.s. af Dallaskynslóðinni þó vissulega horfi ég stundum á hinar desperatísku húsvælur við og við. Hitti að vísu ekki Bobby heldur hjásvæfilinn/kærastann/viðhengið/sambýlinginn eða hvað skal kalla slíkan mann sem maður býr með í synd! Verð ég annars nokkuð að giftast til að kalla mann manninn minn ?  .. Anyone ?