Úff.. hvað er erfitt að vera EKKI að horfa! ..

Ég ákvað að taka mér kaffipásu í vinnunni, en ég er að vinna fram í tímann, þar sem ég verð í veikindaleyfi a.m.k. næstu viku. Búin að vera fanta dugleg. Ætlaði að horfa á vefsjónvarpið en það virkar ekki!!!.. Ég sé hér á vefnum að Noregur er einu stigi yfir, en vona heitt og innilega að við höfum þetta.

ÁFRAM ÍSLAND  ...

Ísland sótti stig til Noregs

Bubbi Morthens = Bein útsending

Ég mun ekki verða með beina útsendingu á beinni útsendingu á landsleik á blogginu í dag, þar sem ég þarf að vinna og get því miður ekki horft á. Ef ég væri ekki að vinna færi ég í göngu niður Laugaveg auðvitað.

Ég sagði frá skemmtilegum misskilningi varðandi Beina útsendingu í einni athugasemdinni hjá sjálfri mér hér í blogginu á undan.

Þannig var að ég var með Au Pair frá Danmörku og höfðum við skroppið út kvöldstund, en hún var heima að horfa á sjónvarpið.

Þegar við komum heim, sagði hún " Flot fyr den "Ben Utsending" han sangeren. Ég varð auðvitað eitt spurningarmerki og fór að fletta yfir dagskrána og þá var það Bubbi Morthens sem hafði verið í beinni, og yfir skjáinn kom auðvitað textinn: BEIN ÚTSENDING...

En hvað um það "ÁFRAM ÍSLAND" ....  Olé, Olé, Olé, Olé ....

 

Handboltaveisla í dag

Kem inn þegar staðan er 14:6 fyrir Ísland, nú þarf Ísland að vinna og ekkert minna!

Eins og sumir og sumar hafa orðið varir og varar við hef ég stundum sett hér inn beinar lýsingar á beinum lýsingum. Ykkur er velkomið að taka þátt og hjálpa við lýsinguna.

Sé að Íslendingar eru að keppa í rauðum búningum og Belgar í hvítum. Nú var Hreiðar, rétt í þessu að verja 10 skotið, flottur í gulri peysu.

Jæja, komaso:

Öruggt gegn Belgum

Útrás og ruslatunna fyrir reiði

Góðan dag, eða þannig.  ...

Ég hef ákveðið að fórna hér einum þræði í útrás, ekki til að fara í útrás heldur fyrir okkur til að fá sameiginlega útrás.. Hugsið ykkur  að á baki ykkar sé bakpoki fullur af reiði, þunga, leiða og doða (ekki erfitt) .. Úr honum má týna og leggja frá sér í athugasemdardálkana mína (ímynduð ruslatunna).  Ég mun svo setja lok á ruslatunnuna og kveikja eld í henni og brenna upp reiðina, leiðina, doðann o.s.frv, ó, já!

Það má skrifa hvað sem er í athugasemd, nema kannski helvítis, djöfulsins, andskoti.. .. eða hvað? ... jú, jú, nauðsyn brýtur lög! Úff hvað mér létti við þetta (ég blóta nefnilega eiginlega aldrei og er algjörlega á móti því).. Það er líka hægt að skrifa /&&%)$$)==Ö=Ö65$$# .. eða bara hvað sem ykkur kemur í hug.

(þetta er tilraun, við sjáum hvernig hún gengur).

 

 

Frá reiði í pönnukökubakstur ..

 

  Ég var búin að skrifa rosalegan reiðilesturspistil hér. Um ábyrgð einhverra karla út í bæ sem aldrei var nein ábyrgð þegar á hólminn var komið, íslenskri þjóð liði eins og sér væri nauðgða o.s.frv.  Erum við búin að heyra þetta áður?  Já, og við eigum rétt á að vera reið.

Svo hugsaði ég með mér; "hverjum gagnast reiði þín Jóhanna" .. ertu að byggja einhvern upp með þessu, ertu að fríska upp andrúmsloftið eða ertu að bæta sóti í það? .. Ég ákvað því að stroka út þetta leiðinlega og setja frekar inn í það ilm af nýbökuðum pönnukökum!

Hvað get ég (og þú)  svo gert til að létta þetta mettaða andrúmsloft? ..Við getum verið Pollýanna. Við getum sinnt þeim sem eru í kringum okkur betur, við getum hlustað á þá sem eiga erfitt. Við getum upphafið hin raunverulegu gildi; vináttuna, kærleikann, samveruna - fjölskylduna. 

Við getum verið náunganum náungi og bakað fyrir hann pönnukökur!  Við heimtum ekki ofurlaun fyrir það, ó, nei, nei..  hvert "takk" og bros og hlýja er forgengilegum auð betra.

"Mamma ég vildi að það væri rafmagnslaust" var setning sem ég fékk stundum að heyra frá börnunum mínum þegar þau voru lítil. Þegar það var rafmagnslaust þá kveiktum við á kertum, spiluðum við eða sungum saman. Við bjuggum í húsi með lofthitun svo hitinn lækkaði líka við rafmagnsleysið. Við þjöppuðum okkur saman og vöfðum um okkur teppum. Urðum svo náin og þurftum ekki mikið rými.

En hvað með pönnukökurnar, þegar það er orðið rafmagnslaust?

Það er hægt að baka pönnukökur á gasi!

Mér er runnin reiðin og langar í pönnukökur! ..

Við Máni í pönnukökubakstri ...

Litrík helgi ...og gömul færsla rifjuð upp ..blogg í skeytastíl

Helgin í stuttu máli:

Kósý kvöld með kallinum á föstudag ..

Skræpóttur sólarhringur með saumó í sumarbústað ..

Flott fjölskylduboð hjá Ingu föðursystur seinni partinn..

Tótallý búin á því ..

Nú er verið að sýna Kongekabale á RUV og bloggaði ég um það í den en þá færslu má sjá hér fyrir neðan:

 

Föstudagur, 11. ágúst 2006

"Kongekabale" og Siv Friðleifsdóttir

Horfði á ágæta danska mynd í gærkvöldi:   ,,Kongekabale." Vel gerð og heldur manni í spennu allan tímann. Pólitískt plot og pot, siðferðislegar spurningar o.fl.  Ætla ekki að skrifa greinargerð um myndina hér en það sem vakti athygli mína var þessi kóngakapall - hræðsla sumra karlanna við að fá konuna við stjórnvölinn. http://www.imdb.com/find?s=all&q=kongekabalen

Þessa mynd horfði ég á sama dag og Siv Friðleifsdóttir er að bjóða sig fram sem formann Framsóknarflokksins. Mér finnst Siv flott og stend með henni, hún er góð fyrirmynd fyrir heilbrigðan líffstíl sem ég kann að meta. Er sjálf óflokksbundin og heillast af fólki en ekki flokkum. Ég vona að Siv verði kosin formaður Framsóknar. Það veitir heldur ekki af fleiri drottningum í kongekabalen.

---

Mér finnst þessi mynd/færsla eiga erindi til okkar í dag, 26.október 2008!

 

Stjörnuspeki og tilviljanir

Fór inn á stjörnuspekisíðu mbl.is og nú er komið upp tímabil sporðdrekans .. sem er "moi" ..  Margt af þessu passar vel við mig (og reyndar líka fólk í öðrum merkjum) en feitletraði það sem hittir alveg í mark, en skáletraði það sem ég tel alls ekki passa. 

Ég var að rabba við Róslín, bloggvinkonu mína, í gærkvöld á msn og sagði henni að það væri ekki að marka stjörnuspá, því að varla lifðu t.d. öll ljón samskonar lífi. En það má leika sér að þessu. Stundum get ég séð á fólki í hvaða merki það er, það er bara svoleiðis! .. Einu sinni hitti ég konu sem kom í svo skvísulegum rauðum stígvélum (að sjálfsögðu háklassa) og bar með sér ákveðinn þokka sem minnti mig á systur mína og mágkonu sem báðar eiga afmæli 3. janúar. Ég spurði hana hvort hún væri Steingeit, hún jánkaði því, en jafnframt hélt hún áfram: "Ég á afmæli 3. janúar"  ... Tilviljun?

Sporðdrekinn

Árstími Sporðdrekans er mitt haustið. Á þessum tíma styttist dagurinn óðfluga og skammdegismyrkrið eykst. Gróðri hnignar, lauf eru fallin af trjám, frost sest í jörð og veður versnar. Fyrir Sporðdrekann er þessi tími mótandi og setur mark sitt á sálina. Hann er því heldur dulur og lifir töluvert í eigin heimi.

Tilfinningar

Sporðdrekinn er tilfinningaríkur og frekar varkár. Að öllu jöfnu virðist hann hægur og rólegur á yfirborðinu, en tilfinningar ólga oft undir niðri. Hinn dæmigerði Sporðdreki er kjarnyrtur og hreinskilinn og lítið fyrir yfirborðsmennsku. Þegar sagt er að Sporðdrekinn sé dulur þarf að hafa eitt í huga. Hann er næmur og tekur tilfinningar og líðan annarra inná sig. Hann heldur fólki því oft frá sér í varnarskyni. Hann vill kafa djúpt ofan í það sem hann tekur fyrir og er því lítið fyrir yfirborðskenndan kunningsskap eða samræður. En þegar hann er með fólki sem hann treystir fyrir tilfinningum sínum er hann alls ekki dulur. Þá er hann oft stjórnsamur og opinskár og á til að ræða hvað sem er. Sporðdrekinn getur því verið dulur og lokaður gagnvart ókunnugum, en að öðru leyti kjarnyrtur og opinskár.

Stjórnsemi

Sporðdrekinn er eitt af stöðugu merkjunum. Það táknar að hann er fastur fyrir og ósveigjanlegur í persónulegum stíl sínum og viðhorfum. "Nei, þetta geri ég aldrei," segir hann og verður ekki haggað. Þó hann geti virst rólegur á yfirborðinu er hann ráðríkur og stjórnsamur. Hann vill ráða, að minnsta kosti yfir eigin umhverfi og lífi.

Heilindi

Sporðdrekinn er skapstór og tilfinningaríkur og tekur ákveðna afstöðu með eða á móti mönnum og málefnum. Hann vill ganga heill að hverju verki, hvort sem er um vinnu, ást eða áhugamál að ræða. Hann er lítið fyrir hálfkák og vill komast til botns í hverju máli. Sporðdrekinn er því ekki maður sem á auðvelt með að skipta sér á milli margra ætlunarverka.

Einbeiting

Alvörugefni Sporðdrekans og þörf fyrir að komast til botns tengist öðrum persónuleikaþætti, sem er einbeiting. Hann hefur þann hæfileika að geta einbeitt sér að ákveðnum málum og útilokað umhverfi sitt og annað sem er óviðkomandi. Segja má að honum hætti til að fá einstök mál á heilann, svo jaðri við þráhyggju.

Kaldhæðni

Skopskyn Sporðdrekans birtist oft í beittum og kaldhæðnislegum athugasemdum. Hann á til að "stinga" með eiturbroddinum fræga þegar sá gállinn er á honum. Hann er því erfiður andstæðingur og vont að lenda í rimmu við hann, enda á hann til að vera grimmur ef fólk reitir hann til reiði eða stendur í vegi fyrir honum. Hann berst hins vegar af sama krafti fyrir þá sem honum þykir vænt um og er að öllu jöfnu traustur og góður vinur.

Dulúð

Sporðdrekinn hefur áhuga og hæfileika á sviði rannsókna. Hann heillast oft af því sem er dularfullt og hefur gaman af að svipta hulunni af yfirborðinu og komast að kjarna málsins. Hann hefur því oft áhuga á spennumyndum og glæpasögum, en einnig á dauðanum, kynlífi og reyndar öllu því sem er á einhvern hátt hulið myrkri, spennu og dulúð.

Einvera

Til að endurnýja lífsorku sína og viðhalda henni þarf Sporðdrekinn að draga sig annað slagið í hlé. Hann þarf á reglulegri einveru að halda. Ef önnur merki viðkomandi Sporðdreka eru félagslynd getur komið að sömu notum að skipta annað slagið um umhverfi. Hann þarf að hreinsa sig af utanaðkomandi áhrifum, til að geta sinnt eigin verkefnum án afskiptasemi og til að koma stillu á 'vatnið'. Einbeitingin er sterkust og ímyndunaraflið flæðir best þegar kyrrð ríkir í umhverfinu.

Þegar talað er um 'Sporðdrekann' og 'Sporðdreka', er átt við þá sem fæddust þegar Sólin var í Sporðdrekamerkinu. Þeir einstaklingar sem fæddust á þeim árstíma hafa 'hjartað' í þessu merki, eða grunneðlið og lífsorkuna.

Staða Tunglsins í merki segir til um tilfinningar, staða Merkúrs um hugsun, Venusar um ást og samskipti, Mars um framkvæmdir, Rísandi merkis um framkomu og staða Miðhimins um (þjóðfélags)markmið. Hver einstakur maður er í nokkrum stjörnumerkjum og þess vegna eru gerð stjörnukort, en ekki bara fjallað um stjörnumerkin.

Fyrir Emil..

Volaða land,
horsælu hérvistar slóðir,
húsgangsins trúfasta móðir,
volaða land!

Hafísa land,
ískrandi illviðrum marið,
eilífum hörmungum barið,
hafísa land!

Vandræða land,
skakkt eins og skothendu kvæði
skapaði guð þig í bræði,
vandræða land!

Drepandi land,
búið með kjark vorn og kjarna,
kúgandi merg þinna barna,
drepandi land!

Vesæla land!
Setið er nú meðan sætt er,
senn er nú étið hvað ætt er
vesæla land!

Hrafnfundna land,
mun þú ei hentugast hröfnum?
Héðan er beint vorum stöfnum,
hrafnfundna land!

Matthías Jochumsson
1835-1920

Var að tala við bróður minn sem er í mastersnámi í guðfræði í henni Köben, og er að lesa ævisögu Matthíasar Jochumssonar. Hann benti mér á þetta kvæði - svona í stemninguna hér!  

Ef þú ert ekki búin/n að lesa hugleiðingar mínar um sjálfsmynd þjóðar, þá er hún hér. Hún er ekki í þessari stemningu Matthíasar, en ljóðið er gífurlega sterkt og ort inn í ástand sem var mun, mun, mun þyngra en er í dag. Þá var fólk að missa börnin sín úr veikindum og vosbúð.

Kreppuráð Jógu nr. 1, dekurbað!

Í kvöld þegar þú kemur heim úr vinnunni, eða ert búin/n að gefa fjölskyldunni að borða og hátta börnin ofan í rúm (ef einhver eru) láttu þá renna í bað, settu ilm í baðið og raðaðu kertaljósum á brúnina. Rósablöðin eru óþörf, bara vesen að sópa þeim saman á eftir, hehe.. Leggstu svo í heitt bað og láttu vatnið gæla við líkamann.. svona, svona, ætla ekki að fara út í neina erótík hér, verð að vera "proper".... Liggðu bara róleg/ur í baðinu, ekki verra að setja upp dvd spilarann eða útvarp og hlusta á fallega tónlist...  

Mundu svo að láta þér þykja vænt um sjálfa/n þig  

 

Sjálfsmynd þjóðar... frelsi, jafnrétti og náungakærleikur á að vera okkar stolt

Ég horfði með öðru auganu á þátt á RUV þar sem dönsk kona fylgdi okkur í ferðalag um Katar. Þar var rætt við arabísk ungmenni. Þau voru bæði frekar frjálslynd.

Það sem vakti athygli mína var það sem ungi maðurinn sagði; hann sagði að mikið af unga fólkinu væri í sjálfsmyndarkreppu vegna uppruna síns; þau skömmuðust sín fyrir að vera Arabar. Það er auðvitað sorglegt.

Undanfarið hef ég heyrt fólk tala um, svona frekar í gamni en alvöru, að það skammist sín fyrir að vera Íslendingar, og væri eflaust hálfhrætt við að viðurkenna þjóðerni sitt væri það statt t.d. í Bretlandi eða Danmörku.

Rasismi er meðal annars fólginn í því að líta stærra á sig en aðra vegna kynþáttar eða trúar. Kynþáttahyggja er íslenska orðið. Við vitum öll að við gætum setið í herbergi með góðu fólki af öllum stærðum og gerðum, kyni, kynþætti, kynhneigð og það gætu allir verið góðar manneskjur.

Þegar ég skrifaði um Moskur nýlega, snérust áhyggjur mínar í þá áttina að múslimar teldu lög sín og trú æðri lögum sem gilda á Íslandi. Ég hafði líka áhyggjur af því ójafnvægi sem virðist ríkja milli kynja hjá þeim sem eru róttækir í trú sinni á Íslam. Misréttið má ekki flytja með inn í landið.  

Við höfum nú þegar trúfélög sem leggja blessun sína á misrétti kynjanna. Kaþólska kirkjan leyfir konur ekki í embætti presta og margir minni bókstafstrúarsöfnuðir hengja sig enn á það að maðurinn sé höfuð konunnar, "as if he was god!"

Ég er á móti þeirri hyggju að telja sig æðri náunga sínum, vegna m.a. kynþáttar, kyns, kynferðis o.s.frv.

Í framhaldi af þessu vil ég hvetja okkur öll til að standa stolt. Stolt fyrir það að þrauka þessar stóru öldur sem á okkur skella. Stolt fyrir að standa með náunga okkar og vera heil.

Verum stolt, kurteis og föllum ekki í sömu gryfju og þeir sem úthrópa Íslendinga, reka þá út úr töskubúðum í Köben eða  gæludýrabúðum í Glasgow. Förum ekki niður á þann "level." Það hafa örugglega verið margir kaupmenn í bæði Köben og Glasgow sem hafa verið prúðir og borið virðingu fyrir sínum viðskiptavinum.

Nú höfum við aðeins fengið að kenna á eigin meðali .. þ.e.a.s. varðandi framkomu við útlendinga. Kona frá Litháen skrifaði í blöðin í morgun og sagðist ekki fá leigt. Hún lendir í því að "borga" fyrir samlanda sína sem hafa verið hér í glæpagengi eða einhverju álíka.

Það myndi samt enginn úthýsa mér ef ég sækti um sama húsnæði, vegna framkomu Benna Ólsara eða annarra íslenskra handrukkara. Samt er ég alveg þrælíslensk (eins og þeir).

Látum ekki vaða yfir okkur,  en vöðum heldur ekki yfir aðra saklausa borgara. Stöndum vörð um það frelsi sem á Íslandi ríkir, málfrelsi, trúfrelsi og jafnrétti.

Því getum við verið stolt af og það styrkir sjálfsmynd okkar sem þjóðar.